Wanasiasa Wanawake Zanzibar Wanavyoipa Kisogo Fursa Ya Mitandao Ya Kijamii Wanaposaka Uongozi wa Kisiasa

 

NA AHMED ABDULLA:

Katika karne ya 21, teknolojia imekuwa nguzo muhimu katika maisha ya kila siku, na mitandao ya kijamii ni sehemu kuu ya mabadiliko hayo.

Mitandao ya kijamii ni majukwaa yanayomuunganisha mtu na kundi la watu kwa haraka na urahisi kwa kutumia teknolojia ya mawasiliano.

Kulingana na takwimu kutoka Mamlaka ya Mawasiliano Tanzania (TCRA), hadi kufikia Mwezi Septemba 2024, takribani Watanzania milioni 41.4 kati ya milioni 61.7 wanatumia huduma za intaneti, hivyo mitandao ya kijamii inakuwa sehemu muhimu ya mawasiliano.

Zanzibar, kama sehemu ya Tanzania, haiko nyuma katika kujiunga na dunia ya kidijitali. Hata hivyo, licha ya kuwepo kwa fursa nyingi katika teknolojia hiyo lakini bado wanasiasa wanawake visiwani Zanzibar hawajatumia ipaswavyo  mitandao hiyo, hasa katika muktadha wa kisiasa.

Moja ya fursa zinazotokana na mitandao ya kijamii kwa wanasiasa ni kupunguza matumizi makubwa ya fedha kwenye kufanya kampeni ambapo Murtadh Mbarak Saleh kijana anayeamini kwenye matumizi ya mitandao ya kijamii anasema mitandao hiyo inapunguza matumizi makubwa ya fedha  kwa wagombea wa nafasi za kisiasa.

“Mitandao ya kijamii inapunguza matumizi makubwa ya fedha wakati wa kufanya kampeni kwa kuwafikia watu wengi kwenye mkutano mmoja” anasema Murtadh

Murtadh anaendelea kwa kusema “Wanasiasa Wanawake wataondokana na changamoto ya matumizi makubwa ya fedha pindi wakitumia mitandao hiyo wakati wanaposaka uongozi na hii itasaidia kufikia asilimia 50 kwa 50 ambayo dunia inaitamani”

Farida Mohameed ni mkurugenzi wa taasisi ya Zanzibar Youth Talk anaitaja faida ya pili ya mitandao ya kijamii kuwa ni kuwafikia hadhira wengi kwa muda mfupi.

“Kama vijana tumekuwa tukifanya kampeni zetu kupitia mitandao ya kijamii na imeleta tija kubwa” Anasema Farida

Aidha anawasisitiza wanawake kwa kusema “Tuache visingizio tuitumie vye mitandao ya kijamii tufikie malengo yetu ikiwemo ya kisiasa”

Hizo ni miongoni mwa fursa chache zinazotokana na matumizi ya Mitandao ya Kijamii kwa wanasiasa lakini wanasia wanawake hawajaichangamkia fusra hiyo.

Suhaila Ussi Pondeza, mjumbe wa Kamati ya Utekelezaji ya Umoja wa Wanawake wa Chama cha Mapinduzi Tanzania (UWT) Wilaya ya Amani Kichama ambapo kwa kanuni ya jumuiya hiyo nafasi hiyo huchaguliwa kwa kupigiwa kura na wajumbe, anakiri kuwa licha ya kuwa na kurasa za mitandao ya kijamii, hajazitumia kikamilifu katika harakati zake za kisiasa.

Anasema, “Mitandao ya kijamii ina fursa kubwa hasa kwetu wanasiasa wanawake sasa nitaitumia kikamilifu.”

Hii inaonyesha kuwa ingawa wanatambua umuhimu wa mitandao ya kijamii, wanawake wengi bado hawajachukua hatua madhubuti kutumia vyema jukwaa hilo.

Maua Mohammed Mussa, ni mwanasiasa aliyegombea nafasi ya Ubunge katika Jimbo la Shaurimoyo kwa tiketi ya Chama cha ACT-Wazalendo mwaka 2020, anazungumzia changamoto ya kutokuwepo kwa elimu ya kutosha kuhusu matumizi ya mitandao ya kijamii, hasa kwa wanawake.

Anakiri kwamba alikosa fursa nyingi kwa kukosa ufanisi katika matumizi ya mitandao ya kijamii.

“Tatizo kubwa ni kuwa wanawake wengi tuna changamoto ya kutokuwa na elimu juu ya matumizi ya mitandao hii,” anamaliza Maua.

Nchini Tanzania unapokuwa mwanasiasa ni lazima uwe na chama cha siasa hivyo Zanlight  Blog imewatafuta baadhi ya viongozi wa vya siasa kujuwa mkakati  wa vyama vyao juu ya kuwahimiza wanasiasa wanawake kutumia mitandao ya kijamii kwenye harakati za kisiasa?

Naibu Katibu   Mkuu wa Umoja wa Wanawake wa CCM Zanzibar Tunu Juma Kondo anasema, “Tunawahamasisha wanawake kutumia mitandao ya kijamii lakini bado hawajashawishika kwa kiasi kikubwa na hii ni kutokana na kutokuishughulikia mitandao hiyo”

Haji Abeid Haji ni Mkuu wa idara ya oganezesheni na uchaguzi wa Chama cha Demokrasia na Maendeleo CHADEMA ofisi kuu ya Zanzibar anasema wamefanya mafunzo ya mara kwa mara kwa vijana na wanawake wa chama hicho katika kuitumia mitandao ya kijamii.

“katiba ya chama chetu inaitambua mitandao ya kijamii na ndio mana tunafanya vikao vya mtandao” anasema Haji huku akiongeza kwa kuwasisitiza wanawake wa chama hicho kujikita katika kutumia zaidi mitandao ya kijamii kama njia ya kujitangaza na kuelezea kazi zao wanazozifanya.

Mkurugenzi wa chama cha waandishi wa habari wanawake Tanzania upande wa Zanzibar TAMWA-ZNZ Dkt. Mzuri Issa anasema licha ya changamoto zilizopo kwenye matamizi ya mitandao ya kijamii lakini bado wanawake wanapaswa kusimama imara kwenye kuitumia mitandao ya kijamii hasa kwenye harakati zao za kisiasa.

“Zipo changamoto kwenye matumizi ya mitandao ya kijamii lakini kama wanawake ziturudishe nyuma tutumie kwenye kufanya shughuli zetu za kisiasa ili tuwafikie watu wengi kwa muda mfupi” anamaliza Dkt. Mzuri

Mtaalamu wa mitandao ya kijamii visiwani Zanzibar Mukrim Mohammed anaeleza fursa nyingi zitokanazo na matumizi ya mitandao hiyo.

Moja ya fursa hizo aanitaja kuwa ni kuwa inamsaidia mwanasiasa anayetumia mitandao ya kijamii katika kujichanganya na wanachi wake hali inayomrahisishia kutambulika kwa haraka.

“Hii inatokana na fursa wanayoipata wananchi wako katika kutoa maoni yao kwenye majukwaa ya mitandao hiyo” anasema Mukrim

Aidha anavishauri vyama vya siasa kuandaa mafunzo ya kuwajengea uwezo wanachama wao hasa wanawake kwenye kutumia kwa usahihi majukwaa ya mitandao ya kijamii.

“Na wakishapata hayo mafunzo wawe na uthubutu wa kuwavutia hadhira kwenye majukwaa yao ili kazi zao zionekane kwa haraka na wafikie malengo yao ya kisiasa” Anaongeza Mukrim

Kwa muktadha huo, ni wazi kuwa mitandao ya kijamii ina fursa kubwa kwa wanasiasa wanawake hivyo, kuna haja ya kuimarisha mikakati ya kuwaelimisha wanawake kuhusu matumizi bora ya mitandao ya kijamii.

Serikali, vyama vya siasa, na mashirika ya kiraia yanapaswa kushirikiana katika kutoa elimu ya matumizi sahihi ya mitandao ya kijamii kwa wanawake na kuwahamasisha kutumia mitandao hayo ili kufikia malengo yao.

Hata hivyo, kupitia juhudi za kuhamasisha, kuwapa elimu, na kuboresha ufanisi katika matumizi ya mitandao hiyo, wanawake wana nafasi ya kuleta mabadiliko makubwa katika siasa na jamii.

Ni jambo jema kuona kwamba wanawake kama Suhaila Ussi Pondeza, Maua Mohammed Mussa, na viongozi wengine wanatambua umuhimu wa mitandao ya kijamii, na ni matumaini kwamba kwa kufanya matumizi bora ya mitandao hiyo, wataweza kufikia malengo yao na kuleta mabadiliko chanya katika jamii na siasa za Zanzibar.