Walimu Waaswa Kuthamini Juhuhudi Za Wadau Wa Maendeleo

 

NA FAUZIA MUSSA:

Mkurugenzi Idara ya Elimu na Maandalizi, Fatma Mode Ramadhan, amewataka walimu kuthamini juhudi za wadau wa maendeleo wanaosaidia kuimarisha miundombinu ya elimu ili kuwa na mazingira mazuri ya kufundisha na kujifunzia.

Wito huo aliutoa wakati akizungumza na walimu wa skuli ya maandalizi Jang’ombe katika hafla ya makabidhiano ya ujenzi wa sakafu nje ya skuli hiyo chini ya ufadhili wa Taasisi ya KOICA Tanzania kupitia mradi wa kuimarisha mazingira ya watoto ya kujifunzia.

Alisema juhudi zinazofanywa na Taasisi hiyo zinaakisi maono ya Rais wa Zanzibar na Mwenyekiti wa baraza la Mapinduzi Dk. Hussein Ali Mwinyi katika kuimarisha sekta ya elimu nchini na zinaimarisha mashirikiano yaliopo kati ya Zanzibar na Korea na kusema kuwa Serikali inawakaribisha wadau wengine kuwekeza kwa watoto wa maandalizi na msingi kwani ndio Taifa la kesho.

Alieleza kuwa maboresho hayo yanawapa hamasa wanafunzi kuendelea kujifunza kutokana na kuwa na eneo salama la kujifunza na kuchezea ikiwa ni sehemu ya kuimarisha hali ya elimu kwa watoto hao.

“kuweka mazingira mazuri ya kujifunzia kunaongeza ujuzi wa watoto wetu na kunaimarisha afya zao kimwili na kiakili” Alisema

Mkurugenzi huyo aliwashukuru KOICA kwa msaada wao katika unaoimarisha hali ya elimu ya maandalizi ikiwa nipamoja na kuweka miundombinu ya elimu, vifaa vya kujifunzia na kufundushia na kuwaongezea ujuzi walimu wa wanafunzi hao.

Mkurugenzi wa KOICA Tanzania, Manshik Shin aliishukuru Wizara ya elimu Kwa mashirikiano yao na Taasisi hiyo na kuahidi kuendelea kuisaidia Tanzania Zanzibar kadiri hali itakavyoruhusu ili kuhakikisha wanafunzi wanakua katakia mazingira bora ya kujifunzia.

Alieleza kuwa kukamilika kwa mradi huo kutasaaidia kuongeza ubora wa elimu kutokana na kuwasaidia walimu kufanya kazi vizuri na kuongeza mbinu mpya za kufundushia.

Akitoa maelezo ya mradi huo Nakyoung lel wa KOICA Tanzani alisema hatua hiyo ilitokana na kuwa eneo hilo halikua rafiki kwa wanafunzi na kuwa katika hatari ya kuumia wakati wowote hali iliyowakosesha hamu ya kusoma na kutohudhuria skuliipasavyo hasa kipindi cha mvua.

Alibainisha kuwa mradi huo ulilenga kutatua kero na adha zilizokuwepo awali na kusema kuwa wamefanikiwa kwa kiasi kikubwa kwani kumekuwa na ongezeko la watoto wanaohudhuria skuli kwa wakati wote bila kujali hali ya hewa.

Alifahamisha kuwa mradi huo ulihusisha kuweka sakafu nje ya skuli hiyo ukarabati wa vyoo, kuchora picha katika kuta, kuweka maua pamoja na ujenzi wa miteremko na kingo ili kuzuia hatari ya wanafunzi kuanguka zoezi lililoanza Oktoba mwaka huu.

Mwalimu Mkuu wa skuli hiyo Harusi Mbarouk Khamis, aliishukuru Wizara ya elimu kwa kuwapokea wahisani hao waliosaidia kuwapatia mazingira mazuri ya kufundishia pamoja na vifaa vinavyotoa hamasa kwa watoto kujifunza.

Mwalim Harusi aliahidi kutunza eneo hilo ili kuenda sambamba na dira ya skuli inayoelekeza kuwa na skuli bora yenye mazingira mazuri ya kufundisha na kujifunzia.

 

Alibainisha kuwa awali wanafunzi wao walipata athari kutokana na kujichoma na mawe yaliyokuwepo eneo hilo na baadhi ya wakati kuanguka kutokana na kuteleza na kusema kuwa hatua hiyo imeondoa changamoto hiyo na kuwa sasa watoto wao watasoma bila udhia.